Tuesday, October 23, 2007

عودة الندل

صباح الفل على الكل
يا رب تكونوا كلكم بخير
بقالى مدة كبيرة جدا ما دخلتش على المدونات لكن فية موضوع شاغيلنى بقالة فترة و حاسيت انى عاوزة اتكلم فيه النهاردة معاكم و اخد رايكم فيه يمكن اكون انا الغلطانة

بقى يعنى لما البنت تحب واحد و تقف جانبة و تحاول تحل معاه كل المشاكل اللى ممكن تواجههم علشان يتتموا الارتباط على خير و سلام و بأقل مشاكل ممكنة
يكون جزاءها انها تنساب و تترمى و كأن هى و كل اللى عملتوه كان مجرد فترة انتقالية فى حاية البنى ادم دة و ان صح القول عيله و يحاول يدور على كلام يقولوهو مبررات سخيفة و عبيطة علشان ينهى الموضوع و كأن شيئ لم يكن و هو حاسس قدام نفسة انه كدة عمل اللى عليه و انه انسحب بأسلوب شيك و محترم

بغض النظر بقى عن الألم اللى البنت دى هتعانى منه كل لما يجى الميعاد اللى كان متعود يكلمها فيه و ميكلمهاش او انهم يتقابلوا فيه و يعدى الوقت كله ساعات طويلة مملة يتسابق فيها الفراغ و الحزن لقتل البنت دى بطريقة الموت البطيئ

و بعد ما تمر السنين و البنت بتحاول مع الأيام انها تتغلب على مشاعر الخزن والألم و الحقد و الكره اللى اتولدت جواها ناحية الناس و محاولة التغلب على نظرة الشماته اللى فى اعينهم بعد كل دة

يرجع الولد يحاول يدخل حياتها من جديدي و يوسط الناس علشان يكملوا الموضوع من حيث انتهى و كأن شيئ لم يكون و كأن البنت دى ماكنتش بتموت فى اليوم الف مرة و بكل بجاحة و تكبر يقول يعنى هيا لسة فاكرة الموقف دة ما احنا كان بينا ذكريات كتير كويسة ليف مش فاكرة الذكريات دى و فاكرة الموقف البسيط دة اللى ما خدش غير يوم واحد فقط

اد كدة الناس بتستخف بمشاعر بعضها و بتدوس على قلوب بعضها و بتكسر فرحتهم و تجرح مشاعرهم و بعد كدة ترجع و كان شيئ لم يكن ، حتى الاعتذار ما عدتش ليه وجود فى قاموس حياتنا اليومية

تفتكروا ايه الرد المناسب اللى البنت دى ترد على الولد ده بيه و هو بيطلب انهم يرجعوا لبعض تانى ؟
بجد رأيكم يهمنى

Thursday, March 15, 2007

حوار مع النفس

صباح الخير يا جماعة
بجد وحشتونى كلكم
امبارح قرات فى مجلة عن موضوع مهم جدا هو هروب اصحاب السلطة و النفوذ من القانون
يعنى مثلا الممثلة فلانة علشلان لها معارف مهمين خرجت من القضية المرفوعة عليها بكل بساطة و الممثلة علانة رغم انها شتمت ظابط شرطة السياحة الا انها خرجت من الموضوع بردة كضحية

و مش بس الوسط الفنى دة فى كمان امراء عرب و رجال اعمال و غيرهم فيه اللى نجح يهرب برة البلد و فيه اللى لسه قاعد فيها و بردة ما نفزش الحكم اللى عليه و ختم الصحفى المقالة ان القانون لم يعد يحمى البسطاءو الفقراء بل يحمى كل من له ظهر فى البلد دى

ما خبيش عليكم بعد ا قريت المقالة دى سألت نفسى لو انا اتحطيت فى مكان اى حد فى المتهمين دول منا بردة هاتصرف كدة و هادور على اى حد مهم اعرفة علشان اطلع من اى قضية و اعتقد كمان ان لو فى اى حد منكم انتوا مطرحى هيتصرف كدة
المسأله معدتش مسألة ضمير كل واحد المسألة اصبحت ازاى نهرب من المسؤلية بأى شكل سواء كنا غلطانين و لا لا

كلنا بقى عندنا لا مبالاة و بقينا نخطط ازاى نقضى يومنا كويس و خلاص بلا متاعب او مسؤليات

ما خبيش عليكم انا نفسى بقيت كدة و كل مدى العملية عندى بتزيد و بلاقى اللى حوليا كمان بقوا كدة و ساعتها بحس انى ماشية صح لكن بين كل وقت و التانى بقف و ابص ورايا و اشوف انا وصلت لفين و طموحاتى اللى كانت موجودة فى يوم من اليام حققت منها اد ايه و بلاقى النتيجة غير مشجعة بالمرة و محبطة و علشان كدة باستمر فى حالة الا مباللاه و التفاهة علشان اهرب من الاحباط يعنى مثلا انا كنت زمان بحب القراء و كنت بقرا روايات عالمية كمان دلوقت كل اللى باحرص على قراءتة هو اخبار الفن و اخبار الموضة و الأزياء و كل ما هو تافه او ما يخلنيش افكر كتير

و كانى اصبحت واحدة تاني واحدة ما كنتش ارضى ابدا انها تكون صحبتى حتى اصحابى اللى كانوا بيرجعوا لى فى حل المشاكل الخاصة بهم لاحظوا التغير دة و بقيت انا بلجا لهم اكثر من الأول

تعرفوا مرة واحدة صحبتى نصحتنى اروح لدكتور نفسانى و كنت فعلا هاروح لكن سألت نفسى لما اقعد قدامة هاقولة ايه ما هو ما فيش حاجة اقولها حتى لو فيه انا ما بعرفش اتكلم عن مشاكلى قدام حد وجها لوجه اكتر حاجة ممكن اعملها انى اكتب فى المدونة

يا ترى ايه السبب فى حالة اللا مبالاة اللى احنا فيها دى و هتنتهى ازاى و امتى هنقدر نواجه مشاكلنا من غير ما حد يحطنا امام الأمر الواقع

فى انتظار مشاركتكم

Thursday, February 15, 2007

احلام بسيطة

النهاردة العصر و انا مروحة من شغلى و ما فيش فى دماغى اى خطة عن اللى هاعملة فى الاجازة كالعادة بخطط لحاجات كتير قوى و فى الأخر ما بنفزش حاجة منها و اجلها للأسبوع اللى بعدة
وقفت عند السوبر ماركت اشترى شويات حاجات و استنيت دورى علشان احاسب لفتت انتباهى بنت صغيرة جدا يدوب سنتين واقفة مع اختها الأكبر منها بحوالى اربع سنين و كانت ملابسهم قذرة للغاية و بعض منها ممزق الواضح ان هما اولاد واحد من بوابين الأبراج الفايف ستارز اللى حوالين السوبر ماركت معرفش ليه فضلت متابعة البنت دى و لقيتها مدت ايدها بكل براءة نحو احد انواع الشيكولاته الفاخرة و التى ابدع منتوجوها فى اختيار الغلاف المناسب لها اللى يشد انتباه الزبون من اول نظرة البنت مدت ايدها علشان تاخد الشيكولاته و فى عينها نظرة ثاقبة و كان كل شيى حواليها اتوقف و ما عدتش سامعة صوت اختها اللى بتامرها انها تسيبها مكانها و لا صوت صاحب السوبر ماركت الى كان بيبسبس للبنت و يحاول يهشها كانه بيهش قطة فى الشارع و لما اخدوا من ايدها الشيكولاتة قعدت البنت تصرخ و تدبدب فى الارض و تبكى بحرقة و صاحب السوبر ماركت علشان يرضيها اداها بونبونة ب 10 قروش علشان ينهى الموقف لكن البنت فضلت تدبدب و تضرح لحد ما لقيت نفسى باشترى الشيكولاتة و بديها للبنت اللى ما صدقتش و خافت تخدها منى و خدتها فى الأخر على الرغم من زعيق اختها الكبرى

معرفش ليه الموضوع دة ماثر فيا قوى مش قادرة انسى البنت و تصرف صاحب السوبر ماركت يعنى هى علشان فقيرة لازم ترضى بالمقسوم و ترضى بالملبسة الرخيصة و مش لازم تبص ابدا على انواع الشيكولاتة الغالية اللى مسموح لها بس انها تبص على الشيكولاتة دة و تشوفها فى ايدين ولاد سكان العمارة

طفلة عمرها سنتين ما تعرفش حاجة فى الدنيا و لا يعنى اى حقوق الانسان و لا يعنى ايه طبقات المجتمع و لا يعنى ايه غنى و لا فقير كل حلمها البسيط فى الدنيا انها تاخد الشيكولاتة مش قادرة اقول لكم اد ايه احترمت البنت دى لما اتمسكت بحلمها و بحقها و رفضت ان الملبسة الرخيصة تكون تعويض عن الشيكولاتة الغالية و هو حلم بسيط لكنها رفضت باصرار ان حد ياخده منها او يستبدله بشئ اخر رخيص رفضت الاستلام و فكرت بينى و بين نفسى يا ترى البنت دى لما تكبر هتفضل كدة و لا هتتغير هتصمد فى وجه التيار و لا هتنداس تحت شعار الطبقية
يا ريت نكون كلنا زى البنت دى ما نتنزلش ابدا عن احلامنا و ما نقبلش اى تعويض عنها ما نتنزلش ابدا عن الشيكولاتة و نرضى بالملبسة الرخيصة و نتعلل باى سبب او حجة نعلق عليه فشلنا .

Saturday, February 10, 2007

التاج علينا حق

بجد يا محمد انا مش عارفة اقولك ايه على دعوتك ليا فى التاج دة
عموما مرسى كتير كتير :

ايه اللى هيحصل لايميلك لما تموتى
طبعا الايميل بتاعى هيتكتب بالذهب الخالص على ورق بردى و يتحفظ فى قاعة المخطوطات النادرة فى قسم المصريات فى متحف اللوفر
اديت الباسورد لحد قبل كدة
مرة واحدة فى حياتى كنت مرتبطة بانسان معين طلب منى الباسوورد بتاعى و لما انفصلنا غيرتة طبعا
اسمك ايه
نهى هانم
اسم الدلع المشهورة به وسط اصحابى
نانوووه
عمرك
27 سنة
برجك
الجوزاء و احمل كل صفات الربج و اهم ما فيها تقلب المزاج
مجال دراستك
ادب انجليزى
شخصيتك نوعها ايه
انا هاجاوب على السؤال دة من خلال اراء الناس عنى انا بحب الناس و بتعامل معاهم بصفاء نية و طيبة زيادة عن اللزوم و يمكن دة شيئ سبب لى مشاكل كتير و كمان اجتماعية و بحب يكون لى اصحاب كتير بفكر فى الناس اللى حواليا اكتر من نفسى لدرجة انى ممكن انشغل بمشكلة حد من اصحابى او زملائى فى الشغل و احاول احلها باى طريقة اما بالنسبة لعيوبى فاكتر واحد فيها هو انى مودية بدرجة كبيرة و دايما بحب التغيير يعنى لازم اغير كل شيئ املكة باستمرار حتى لو غيرت كرسى من مكانة فى البيت بدون ما اشترى كرسى جديد مكانة دة شيئ بيسعدنى جدا
السفر بالنسبة لى
شيئ ممتع لانه تغيير لكن اكتر حاجة بكرها فى السفر هو الساعات اللى باستغرقها فى السفر يعنى باكره مووت قاعدة الأتوبيس او العربية او اى شئ بكون عاوزة اغمض عينى و افتحها الاقى نفسى وصلت نفسى كمان نفسى اعمل عمرة لكن لما اتجوز علشان انا دلوقت ما عنديش محرم
المود بتاعك
ذى ما قلت انا مودية جدا بحب التغيير بدرجة مجنونة تقدر تقول بعشق التغيير اقل حاجة تفرحنى و اقل حاجة تزعلنى و افضل متعكننة طول اليوم
وقت فراغك بتعملى فيه ايه
تقريبا ما عنديش وقت فراغ على طول بلاقى حاجة اعملها و احيانا بحس اليوم ما بيكفيش انا يا اما باشتغل يا خارجة يا باشتغل فى البيت يا بتفرج على التليفزيون يا قدام الكمبيوتر دايما عندى الف حاجة اعملها .
الأكلة المفضلة
مش اكلة معينة لكن عموما انا بحب الأكل الايطالى قوى ( بيتزا - مكرونة - لازانيا - كانولونى ) و بحب كمان المشويات تقدر تقول ان لو كانت البيتزا رجلا لتزوجتة

الصفات الى اخدتها من بابا
الطيبة - خدمة الناس بلا مقابل - الحرص على الكسب الحلال
الصفات التى اخذتها من ماما
هو انا فى الحقيقة اخذت الصفات دى لكن احيانا بتظهر و احيانا لا يعنى مثلا طولة البال و التعامل مع الناس بلباقة الاحترام الشديد لمشاعر الغير طبعا ماما و بابا فيهم صفات حلوة كتير قوى لكن انا باتكلم عن اللى اختة بس ( نوعا ما يعنى )
اكتر ستة حاجات بحبها
- صلاة الفجر و قرءاة سورة الواقعة و ما حدش يسالنى ليه انا جربت الموضوع دة و لقيت ان اليوم دايما بيعدى جميل بدون مشاكل و من يومها قررت انى مش هاكسل ابدا عن الصلاة و القراءة
SHOPPING - بحبة موووووت
- سماع الأغانى عربية و اجنبية
- البيتزا (my beloved)
- التجارة بحب مووت اشغل دماغى و ما اعرفش ليه دماغى بتشتغل فى الشر اكتر من الخير حتى لو المكسب مش كتير بس باستمتع جدا لما امسك التراب و يتحول فى ايدى لفضة مش هاقول دهب علشن ما تبقاش وسعة شوية
- هيه حاجة غريبة شوية لكن بحبها و بعد قدمها بالساعات عارفين القنوات الى باتشغل قرءان على طول اليوم بحب اقرا الترجمة الى مكتوبة بالانجليزى يمكن عايزة اعرف الناس دى بتفهم القران الزاى
- بحب قوى المكياج بانواعه و الابتكار فيه كمان
شخصية متناقضة مش كدة مش بقولك جوزائية
اكتر سته حاجات بكرههها
- الصحيان بدرى للشغل
-اثق فى شخص قوى و احبة قوى و يخوننى انا باكره الخيانة بجميع انواعها
- اكون مفلسة
- الفشل بجميع انواعه بصراحة ما بتحملش الهزيمة
- ان ادى لشخص ما اهتمام معين و اعملة حساب و هو يتجاهلنى
- زيارة شخص غير مرغوب فيه و من غير موعد سابق
-اكتر حاجة تضايقنى جدا و بسرعة لما انزل الاقى العربية بتعتى مخبوطة و هى واقفة مكانها
الشغل بالنسبة ليا
تقريبا كل حياتى يعنى اغلب اصحابى من الشغل و وقتى اغلبة فى الشغل خصوصا انى باشتغل فترتين بصراحة ما اقردش اتخيل حياتى و انا ما باشتغلش
ايه الكمبيوتر و الانترنت بالنسبة لك
بصراحة علاقتى بالكمبيوتر بعيدا عن استخام الشغل بدات من فترة قريبة لكن لقيت نفسى بادخل فى الموضوع بسرعة و اتعلمت لغات برمجة و حبيت العملية اما الانترنت فانا تقريبا مقضية حياتى قدام الكمبيوتر بس لو سمحتولى اقول انى باكرة الشات مووت و باعتبرة طريقة متخلفة للحوار كله كدب و كمان بحس بملل شديد لو سالت واحدة عن شكلها تقول انا ذى كاترين زيتا جونس و هى فى الحقيقة كاترين و عيلتها كلها بريئة منها و لو سالت واحد بتشتغل ايه يقولك فى شركة كبيرة و منصب مرموق و هو يكون شغال كهربائى مثلا او ميكانيكى فى ورشة
احب امرر التاج لمين
انا لسة ما اتعرفتش على ناس كتير لكن امررة لكل من
الحصان الأسود
هلوسة مصرية
النهاردة عاوزة اعرض عليكم مشكلة خاصة بصديق مقرب لى جدا
باعتبرة اخ حقيقى ليا و لما قعدت مع نفسى لقيت انها مشكلة ممكن يكون كتير من الشباب بيواجهها
مشكلته انه مش لاقى واحدة يتجوزها ، ما اخبيش عليكم هو صايع حبيتين يعنى تقدروا تقولوا انه عنده القدرة انه يكلم كل يوم بنت جديدة و كل واحدة يعجب بيها يفكر فيها على انها ممكن تكون عروسة مناسبة و لما يتكلموا كتير بعد كدة يلاقى الأمور اخدت مجرى تانى و البنت اللى كان فاكرها قطة مغمضة تطلع حاجة تانية و هكذا على طول الخط لحد انه بقى بيشك فى كل الناس اللى حواليه و نفسة يتجوز لكن مش لاقى و لا واحدة كويسة عرضت عليه يجرب الطرقة البدائية فى الزواج و هى طريقة الصالونات اى ان الأهل هم اللى يخطبوا له واحدة يعرفوا اصلها و فصلها كويس لكن هو بيقول ان الوضع كدة هيكون محرج اكتر يعنى لو هو و البنت اختلفوا هيحصل مشاكل بين الأهل و بعضهم و خصوصا لو كانوا قرايب و بعدين يضمن منين ان البنت تتوافق معاه فى التفكير و الأسلوب
انا نفسى مش عارفة ارد عليه اقول ايه هل الأفضل ان الشاب يتجوز اليومين دول عن طريق الأهل و لا عن طريق النت و مواقع الجواز اللى بقت اكتر من مطاعم التيك اواى و لا عن طريق انه يشوف واحدة تعجبة و يحاول يكلمها و هل يا ترى لو وافقت هتكون ساعتها مؤدبة و لا صايعة يعنى تنفع زوجة و لا لأ ؟

فى انتظار مشاركتكم

Wednesday, February 7, 2007

كله ماشى

امبارح بالليل و انا بقلب فى قنوات التليفزيون مش لاقية حاجة اعملها كالعادة و هامووووت من الملل و خصوصا لما باتفرج على قناة ميلودى افلام " اللى هى مصدر الملل كلة " اتفرجت بالصدفة على اللقاء الذى يجرية مقدم البرامج المشهور اللى دايما يعارض الناس الى مستضيفهم بس علشان يبين انه شخص من عامة الشعب العاديين و انه بيمثل صوت المواطن المقهور .
استفزنى جدا رد مدير المرور على السؤال الى وجهه له المذيع المتأنق دائما و السؤال على فكرة هو " ليه قوانين المرور عندنا حازمة زيادة عن اللزوم و ان الشعب بيشتكى من عدم المساواة فى الظلم بمعنى ان واحد يروح المرور يلاقى عليه مخالفات بالألوفات و علشان قريبة فلان او علان ما يدفعش و يتشالوا بجرة قلم ؟"
هنا بقى مدير المرور فجر المفجأة و قال انه لما راح قلم المرور الصبح لقى ان عليه 5000 جنية مخالفات و انه لازم يدفع المبلغ دة لان القانون ما يعرفش ابن فلان و لا ابن علان و ان المرور بيسهل على المواطن كافة الاجراءات لتسديد الغرامات و انه نجح فى القضاء على الروتين .
تصوراان دة ممكن يحصل ؟ اه ممكن يحصل لكن فى عام 2060 إن شاء الله لما يكون كل شيئ بيتم حوالينا من خلال الكمبيوتر علشان الكمبيوتر ما يعرفش فلان و لا علان و لو ان انا متأكدة ان ساعتها هيلاقوا حل و يرشوا الكمبيوتر يا اما " بهارد جديد " او " بماوس واير ليس محصلتش " و كله ماشى ذى ما قالت " نادية الجندى" فى فيلم خمسة باب"
انا كنت اعرف واحد مهم جدا فى المرور و كنت لما اخد مخالفة ابلغوا و على طول تتشال او الرخصة تتسحب و بعد ساعة واحدة تكون عندى لكن بعد ما سافر و طبعا انتوا عارفين ان اللى بيبعد عن منصبة كأنه كلب و راح رخصتى اتسحبت امبارح و كان لازم اقف فى نفس طابور الناس الغلابة الى ما لهمش ضهر علشان ارجع الرخصة المسحوبة و روتين و اجراءات معقدة و روحى هنا لا روحى هنا مشاوير ملهاش اى لازمة خلونى لعنت اليوم اللى سوقت فيه و لان طبعا كل شئ ماشى عندنا بالفلوش اتبعت مبدا هين نفسك و لا تهين قرشك و دفعت فلوش للعامل الى بيصور الورق علشان يخلص الاجراءات كلها بدالى و قعدت على الكرسى بعيد اتفرج على المواطن الغلبان و ما اعرفش ليه افتكرت كلام مدير المرور و سألت نفسى يا ترى ايه هو مفهوم المساواة فى الظلم بالنسبة له و يا ترى لما مدير المرور هيدفع ال 5000 جنية غرامة هيقف بردة فى الطابور و لا هايعمل ايه ؟