Saturday, February 10, 2007

النهاردة عاوزة اعرض عليكم مشكلة خاصة بصديق مقرب لى جدا
باعتبرة اخ حقيقى ليا و لما قعدت مع نفسى لقيت انها مشكلة ممكن يكون كتير من الشباب بيواجهها
مشكلته انه مش لاقى واحدة يتجوزها ، ما اخبيش عليكم هو صايع حبيتين يعنى تقدروا تقولوا انه عنده القدرة انه يكلم كل يوم بنت جديدة و كل واحدة يعجب بيها يفكر فيها على انها ممكن تكون عروسة مناسبة و لما يتكلموا كتير بعد كدة يلاقى الأمور اخدت مجرى تانى و البنت اللى كان فاكرها قطة مغمضة تطلع حاجة تانية و هكذا على طول الخط لحد انه بقى بيشك فى كل الناس اللى حواليه و نفسة يتجوز لكن مش لاقى و لا واحدة كويسة عرضت عليه يجرب الطرقة البدائية فى الزواج و هى طريقة الصالونات اى ان الأهل هم اللى يخطبوا له واحدة يعرفوا اصلها و فصلها كويس لكن هو بيقول ان الوضع كدة هيكون محرج اكتر يعنى لو هو و البنت اختلفوا هيحصل مشاكل بين الأهل و بعضهم و خصوصا لو كانوا قرايب و بعدين يضمن منين ان البنت تتوافق معاه فى التفكير و الأسلوب
انا نفسى مش عارفة ارد عليه اقول ايه هل الأفضل ان الشاب يتجوز اليومين دول عن طريق الأهل و لا عن طريق النت و مواقع الجواز اللى بقت اكتر من مطاعم التيك اواى و لا عن طريق انه يشوف واحدة تعجبة و يحاول يكلمها و هل يا ترى لو وافقت هتكون ساعتها مؤدبة و لا صايعة يعنى تنفع زوجة و لا لأ ؟

فى انتظار مشاركتكم

5 comments:

ياسمين said...

هو مجرب وكل يوم مع واحدة وعاوز قطة مغمضة؟؟؟

غريب أمر الرجال فعلا

هو نفسه بيعمل اللى مش قابل ان المرأى تعمله وكأن البنات بصيعوا مع نفسهم مش مع شباب من النوع بتاعه دة

مش مهم البنت عرفت مين قبله المهم هتبقى ايه معاه هو

ولو هو نفسه قطة مغمضة يبقى كان يتجوز قطة مغمضة لكن هو مفتح ونص كمان

NOHA said...

ياسمين
ما هو كل حجته انه كل البنات الى مشوا معاه دول مش مؤدبين و مش بتوع جواز و انه مش لاقى بنت واحدة مؤدبة و هو زى اى راجل بيفتكر انه راجل شرقى بس لما يجى يجوز و بينسى حكاية رجل شرقى دى لما يصيع و يلعب بديلة
ما فيش حد صريح مع نفسة
ما هى الموضة اليومين دول كدة كل واحد عاوز يتجوز علشان يكمل البرستيج بتاعة يبقى عنده شقةو عرابية و زوجة و عشيقة و موبايل و شلية فى مارينا و بكدة يكون روش و عايش عيشة استايل

فؤاده said...

والله انا متفق معاكم انتو الاتنين

يبقى الراجل جايبها من شرقها لغربها ويرفض البنت عشان ابن خالتها اداها رنة على الموبايل

بس قوليلي انتتي رايك ، هو موضوع جواز الصالونات بيكون صعب على البنت ، يعني تتقبل ان شاب يقعد معاها وبعدين ميحصلش نصيب ولا بتتضايق جامد

NOHA said...

فؤادة
لحد فترة قريبة جدا كنت متمسكة بحقى انى لازم الأول احب الشخص اللى هاتجوزة و ان احنا نكون عارفين بعض علشان نقدر نكمل حياتنا و نستحمل بعض
لحد ما اكتشفت بعد تجربة نفسية عميقة تقدر تقول كدة سببيت لى عقدة من الجواز اصلا
ان افضل شيئ هو جواز الصالونات لأن الشاب بيكون دخل البيت و محترم اللى فيه و محترم اهلة و عامل حسابهم و عامل حساب الناس اللى اتوسطوا فى الموضوع
اما بقى يحصل نصيب او لا دة كله بتاع ربنا و صدقنى لما اتنين يتقابلوا عن طريق الصالونات و ميحصلش نصيب افضل عما يكونوا عارفين بعض علشان كل واحد فيهم رايح و هو حاطط احتمال القبول او الرفض سواء منه او من الطرف التانى و علشان ما فيش لسه مشاعر بينهم بيكون واقع الصدمة اخف
اما اذا كانوا عارفين بعض و الناس عارفة كمان لما بيسبوا بعض كل واحد منهم و البنت بالذات بتكون عايزة الأرض تتشق و تبلعها و تدخل فى صراع نفسى رهيب علشان تثبت لكل الناس ان هى و لا همها على الرغم من انها بتتقطع من جواها و يفضل كل واحد متابع اخبار التانى من بعيد و يعمل كل اللى فى وسعة علشان يثبت انه هو الأحسن و انه هو الفائز فى النهاية

عموما تقدر تقول كدة ان الجواز دة كاس و داير مهما تهرب من نصيبك هيجرى وراك لغاية ما يجيبك و تدخل القفص و تفضل طول حيات فى صراع اما انك تتكيف على وضع الحياة داخل القفص او تدور على حد معاه المفتاح

eng_abutreika said...

الموضوع فعلا مهم واعتقد انه صديقك ده مستحيل يلاقي قطة مغمضة"في البنات اللي بيعرفهم كل يوم وهو زي موصفتيه"صايع حبتين" والحل انه هو يكون كويس عشان يلاقي بنت كويسه

ENG_ABUTREIKA
م.ابوتريكه