Tuesday, October 23, 2007

عودة الندل

صباح الفل على الكل
يا رب تكونوا كلكم بخير
بقالى مدة كبيرة جدا ما دخلتش على المدونات لكن فية موضوع شاغيلنى بقالة فترة و حاسيت انى عاوزة اتكلم فيه النهاردة معاكم و اخد رايكم فيه يمكن اكون انا الغلطانة

بقى يعنى لما البنت تحب واحد و تقف جانبة و تحاول تحل معاه كل المشاكل اللى ممكن تواجههم علشان يتتموا الارتباط على خير و سلام و بأقل مشاكل ممكنة
يكون جزاءها انها تنساب و تترمى و كأن هى و كل اللى عملتوه كان مجرد فترة انتقالية فى حاية البنى ادم دة و ان صح القول عيله و يحاول يدور على كلام يقولوهو مبررات سخيفة و عبيطة علشان ينهى الموضوع و كأن شيئ لم يكن و هو حاسس قدام نفسة انه كدة عمل اللى عليه و انه انسحب بأسلوب شيك و محترم

بغض النظر بقى عن الألم اللى البنت دى هتعانى منه كل لما يجى الميعاد اللى كان متعود يكلمها فيه و ميكلمهاش او انهم يتقابلوا فيه و يعدى الوقت كله ساعات طويلة مملة يتسابق فيها الفراغ و الحزن لقتل البنت دى بطريقة الموت البطيئ

و بعد ما تمر السنين و البنت بتحاول مع الأيام انها تتغلب على مشاعر الخزن والألم و الحقد و الكره اللى اتولدت جواها ناحية الناس و محاولة التغلب على نظرة الشماته اللى فى اعينهم بعد كل دة

يرجع الولد يحاول يدخل حياتها من جديدي و يوسط الناس علشان يكملوا الموضوع من حيث انتهى و كأن شيئ لم يكون و كأن البنت دى ماكنتش بتموت فى اليوم الف مرة و بكل بجاحة و تكبر يقول يعنى هيا لسة فاكرة الموقف دة ما احنا كان بينا ذكريات كتير كويسة ليف مش فاكرة الذكريات دى و فاكرة الموقف البسيط دة اللى ما خدش غير يوم واحد فقط

اد كدة الناس بتستخف بمشاعر بعضها و بتدوس على قلوب بعضها و بتكسر فرحتهم و تجرح مشاعرهم و بعد كدة ترجع و كان شيئ لم يكن ، حتى الاعتذار ما عدتش ليه وجود فى قاموس حياتنا اليومية

تفتكروا ايه الرد المناسب اللى البنت دى ترد على الولد ده بيه و هو بيطلب انهم يرجعوا لبعض تانى ؟
بجد رأيكم يهمنى

4 comments:

فؤاده said...

حمد الله على السلامه
لما تبقي تغيبي فترة طويلة كده وترجعي ابقى عرفينا مش نعرف من بره
اما بالنسبة للموضوع بتاعك
اصعب حاجه في الدنيا الواحد يضحي عشان حد ما يستهلش
والغريب ان فيه حد مايستهلش يلاقي حد يضحي عشانه
رغم ان انا مقدر كل المشاعر اللي مريتي بيها
بس انتي غلطانة عشان ماخدتيش بالك من حاجه زي كده
بس تجربة لازم الواحد يتعلم منها
اما رجوعه ليكي فدليل على قد ايه انتي كنتي عبيطة
وتفكيرك في الموضوع دليل على ان انتي بتهرجي
وسؤالك على راي الناس دليل ان انتي ماتعلمتيش ولا حاجه

NOHA said...

فؤادة

انت اولا بتضحى و مش عارف ان اللى قدامك ما يستاهلش التضحية دى لكن بعد كدة اللى بيزعل الواحد انه بيكتشف انه كان عبيط و عايش فى عالم خيالى فى خيالة فقط

انا مش بسأل الناس عن رأيهم فى انى ارجع له و لا لأ
انا بسأل الناس عن ايه الشيئ اللى ممكن اعمله معاه و يرجع لى كرامتى و يا ترى ازاى اخليه يندم على اللى حصل و احقق له اكبر خسارة فى حياته و اكسر فيه الغرور اللى خلاه يتصور انه يوم ما هيطلب يرجع لى انى ممكن اوافق .

مدحت said...

من كلامك واضح جدا انك لسه بتحبيه
أو على الأقل لسه شاغل جزء في تفكيرك
والدليل إنك عايزة تخليه
بتسالي ازاى اخليه يندم على اللى حصل و احقق له اكبر خسارة فى حياته و اكسر فيه الغرور اللى خلاه يتصور انه يوم ما هيطلب يرجع لى انى ممكن اوافق
أنا مريت بتجربتك مع واحدة حبيتها ووقفت جنبها ومقدرتشي تستناني وافترقنا لكني تجاوزت الأزمة بفضل الله وربنا رزقني بزوجة صالحة وعقبالك... سيبك منه ومترديش عليه لا بالكويس ولا بالوحش وركزي في طريقك انتي وبس وان شاء الله طول ما بتقري سورة الواقعة ربنا هيكرمك وهتضحكي لما تفتكري الايام الوحشة اللي عدت

مواطن مصري said...

اصعب شىء ان انسان يحب بجد
و ينضرب من الي بيحبة


يبقى ميستحقش الحب