Thursday, March 15, 2007

حوار مع النفس

صباح الخير يا جماعة
بجد وحشتونى كلكم
امبارح قرات فى مجلة عن موضوع مهم جدا هو هروب اصحاب السلطة و النفوذ من القانون
يعنى مثلا الممثلة فلانة علشلان لها معارف مهمين خرجت من القضية المرفوعة عليها بكل بساطة و الممثلة علانة رغم انها شتمت ظابط شرطة السياحة الا انها خرجت من الموضوع بردة كضحية

و مش بس الوسط الفنى دة فى كمان امراء عرب و رجال اعمال و غيرهم فيه اللى نجح يهرب برة البلد و فيه اللى لسه قاعد فيها و بردة ما نفزش الحكم اللى عليه و ختم الصحفى المقالة ان القانون لم يعد يحمى البسطاءو الفقراء بل يحمى كل من له ظهر فى البلد دى

ما خبيش عليكم بعد ا قريت المقالة دى سألت نفسى لو انا اتحطيت فى مكان اى حد فى المتهمين دول منا بردة هاتصرف كدة و هادور على اى حد مهم اعرفة علشان اطلع من اى قضية و اعتقد كمان ان لو فى اى حد منكم انتوا مطرحى هيتصرف كدة
المسأله معدتش مسألة ضمير كل واحد المسألة اصبحت ازاى نهرب من المسؤلية بأى شكل سواء كنا غلطانين و لا لا

كلنا بقى عندنا لا مبالاة و بقينا نخطط ازاى نقضى يومنا كويس و خلاص بلا متاعب او مسؤليات

ما خبيش عليكم انا نفسى بقيت كدة و كل مدى العملية عندى بتزيد و بلاقى اللى حوليا كمان بقوا كدة و ساعتها بحس انى ماشية صح لكن بين كل وقت و التانى بقف و ابص ورايا و اشوف انا وصلت لفين و طموحاتى اللى كانت موجودة فى يوم من اليام حققت منها اد ايه و بلاقى النتيجة غير مشجعة بالمرة و محبطة و علشان كدة باستمر فى حالة الا مباللاه و التفاهة علشان اهرب من الاحباط يعنى مثلا انا كنت زمان بحب القراء و كنت بقرا روايات عالمية كمان دلوقت كل اللى باحرص على قراءتة هو اخبار الفن و اخبار الموضة و الأزياء و كل ما هو تافه او ما يخلنيش افكر كتير

و كانى اصبحت واحدة تاني واحدة ما كنتش ارضى ابدا انها تكون صحبتى حتى اصحابى اللى كانوا بيرجعوا لى فى حل المشاكل الخاصة بهم لاحظوا التغير دة و بقيت انا بلجا لهم اكثر من الأول

تعرفوا مرة واحدة صحبتى نصحتنى اروح لدكتور نفسانى و كنت فعلا هاروح لكن سألت نفسى لما اقعد قدامة هاقولة ايه ما هو ما فيش حاجة اقولها حتى لو فيه انا ما بعرفش اتكلم عن مشاكلى قدام حد وجها لوجه اكتر حاجة ممكن اعملها انى اكتب فى المدونة

يا ترى ايه السبب فى حالة اللا مبالاة اللى احنا فيها دى و هتنتهى ازاى و امتى هنقدر نواجه مشاكلنا من غير ما حد يحطنا امام الأمر الواقع

فى انتظار مشاركتكم

18 comments:

أحمد سلامة said...

كلنا بقى عندنا لا مبالاة و بقينا نخطط ازاى نقضى يومنا كويس و خلاص بلا متاعب او مسؤليات

الفقرة الصغيرة دي هي البوست كله
ازاى نقضى يومنا
ازاى نقضى يومنا
ازاى نقضى يومنا
لما يكون عندنا هدف يومن هيتقضى أكيد غصب عننا كويس
المشكله ان كلمه كويس دي فضفاضه قوي ومتباينه بين ناس وناس
جميل منك تناولك لموضوع مهم زي ده
تحياتي

مصر هى أمى said...

نهى

اللامبالاةاللى احنا عايشين فيها سببها ان مفيش حاجة بتشغل الناس
زمان كان فيه قضية الاحتلال والملك والثورة وبعد كده جت حرب 56 وبعد كده حرب 67 وحرب 73 اما الان الناس فاضيه مفيش هدف قومى الناس عايشة على امل تحقيقه مما ادى لانتشار الفساد فده اللى خلا الناس كلها تقلد المرتشيين لانهم لاقوهم هما دول صفوة المجتمع واللى بيظهروا فى التليفزيون وان الدولة بتكرم الراقصات والحرامية فالناس بدات تقلدهم
مصر اصبح فيها الخلل كبير جدا والتفاوت بين طوائف الشعب كبير

حمد الله على سلامتك من الاجازة اللى حرمتينا فيها من بوستاتك

NOHA said...

احمد سلامة

شكرا انك رضيت على البوست بتاعى و يا رب ما تكونش المرة الأخيرة

فعلا هدف البوست كلة ازاى نقضى يومنا
بس عاوزة اقولك حاجة ان الناس حتى ما عدتش بتخطط تقضى يومها ازاى

الناس كلها تفريبا بتصحى الصبح و تستقبل ما فى اليوم من مفاجئات و تتعامل معاها

لم يعد هناك هدف او غاية

و المجتمع اصبح يتجه نحو كل ما هو تافة و سفيه

NOHA said...

مصر هى امى

مرسى كتير يا محمد

احب اقولك حاجة ان الناس زمان كان اللى بيحمسها و يشغل بالها مش بس السياسة لا دة كمان كان فيه ابداع و طلب علم

يعنى فى فترة زمنية معينة تقدر تقول من 20 سنة تقريبا كان فيه شريحة معينة من المجتمع حريصة على تلقى العلم و الحصول على الماجيستير و الدكتوراة لكن التهاردة الشريحة دى تقلصت تماما حتى المعيد او الدكتور اليومين دول اصبح هدفه الأول هو جنى المال

و اعتقد ان سبب اللامبالاة دى دلوقت هو ان الناس مش قادرة تجارى الظروف و التغيرات الى بتحصل حواليها

نلاقى ان الأب فى الأسرة ذات المستوى المتوسط مش هاقول المستوى الضعيف ابنه بيطلب منه موبايل احدث نوع و عربية و هدوم كل شهر تقريبا و الأب قدامة طريق من اتنين يسرق و يقبل رشوة او انه يكبر دماغة و يكون عنده لا مبالاه و تكون دى هى الطريقة المثل فى حل المشاكل و تنعكس الامبالاة دى على حياته كلها .

الأرمـوطــي said...

معظم مشاكل حياتنا بقت ملهاش حل مهما تفكرى فيها الامبالاه هى الحل الوحيد ياما هنتجنن بس مش معنا ذلك اننا نبطل تفكير فى الحاجات الى ممكن نوصل فيها لنتيجة لكن مع الاسف الحاجات دى محدوده جدا ومش مهمه على اى حال موضوعك مهم وطريقتك شيقه جدا .........سلام

فؤاده said...

نهى حمدالله على السلامة

انتي اتكلمتي في موضوعين
اول موضوع من اكتر المواضيع اللي بكرهها
يبقى الواحد بياخد رشوى وبيعمل وسايط وبيعمل كل حاجه ولما يتكلم يقلك البلد بايظه
وهو واللي زيه هم اللي خاربينها
اسوأ حاجه اللي بيشاركو في الفساد ويفضلو ينقدو فيه
عشان كده مش لازم نكون زيهم
ابدا

اما الموضوع التاني
احب اقولك ان كلنا بنعاني من الموضوع ده ، بنتوه وبنسرح والدنيا بتاخدنا وبننسى احنا رايجين فين وعايزين ايه
بس الموضوع مش محتاج دكتور نفسي ولا حاجه
كل الموضوع ان احنا لما نقف ونبص ورانا ونلاقي ان احنا معملناش حاجه ، نصحح المسار ونعالج اخطائنا ونفوق

على فكرة انتي وصفتي شخصية المصري وصف دقيق موت في الجملة ده


نخطط ازاى نقضى يومنا كويس و خلاص بلا متاعب او مسؤليات

ياسمين said...

شكرا لزيارتك لى وتعليقك الجميل اللى سبتيه أثر فية قوى

بجد شكرا

تحية من قلب مجروح

ibn nasser- ابن ناصر said...

لامبالاه ماهو ده هدف النظام وقد نجحوا ,اسألي اي واحد في الشارع يقولك وانا مال مالبلد بلدهم ياعم وكلام ده
وماتروحيش دكتور نفسي بصي احنا نتقابل كلنا عند مستشفي المجانين
تحياتي

halwasa-masrya said...

نانو .. صباح الفل .. اللامبالاة .. يعنى من الاخر تكبير الدماغ .. عشان لو مكبرناش دماغنا يبقى هنقضى اليوم كله فى نكد .. تلاقى مثلا اتنين تعرفيهم اتكلموا عليكى من وراكى وانتو مش اذيتهم .. كبرى مخك وخللى عندك لامبالاة الطف ما تولعى فى نفسك ... وعارفة كمان صحيح معظمنا وانا واحدة منهم بحاول اقضى يومى من غير متاعب والاهم من غير نكد بس فى اغلب الاحوال بنفشل يعنى وبعدين انسى حكاية الدكتور دى عشان اخره هيسمعلك وبعدها هيكتبلك حاجة تظبط لك المود بتاعك .. والحاجات دى ظريفة جدا عن تجربة طول ما انتى مع الناس بره وتهيسى بس بجد لما ترجعى على سريرك وبيتك بتتحنقى من نفسك ومن الناس اللى كانت معاكى اصلا ...

انا جربت اهتم بحد واركز فيه اوى ( بيبى صغير ) واخليه محور حياتى عشان ابعد عن اللامبالاة بس بينى وبينك يعنى ده هروب اوى ... الوسايط باه ..حدث ولا حرج .. وهى دى مصر يا عبلة

يالا معلش طولت عليكى ....

NOHA said...

ارموطى

انا معاك ان اللامبالاة اصبحت هى الحل الوحيد للهروب من المشاكل لكن احنا عارفين من جوا نفسنا اننا بنهرب مش بنحل المشكلة و بكدة هتفضل المشكلة موجودة و هنفضل نهرب منها الى مالا نهاية

NOHA said...

فؤادة

بالنسبة للموضوع الأول اللى انت علقت عليه و هو الرشوة احب اقولك ان اللى بياخد رشوة دة مقتنع تماما من داخلة انه اشرف واحد فى الدنيا و انه ما بيخدش رشوة و لا حاجة و ان كل الناس على كدة و يبدأ يبرر لنفسة كل قرش حرام لحد ما يصدق الكدبة اللى هو عملها من الأول و بكدة يعتبر نفسة واحد من الشرفاء الضحايا اللى مش اخدين حقهم فى الدنيا.

اما بقى الموضوع التانى احب اقولك ان احنا بنتوه بمزاجنا و بنرضى بالأمر الواقع بمزاجنا بردة و بنحب قوى نحس ان احنا مظلومين و عايزين اللى يقف جنبنا و اعتقد ان دة سبب من اسباب تأخرنا كشعب عن دول العالم الأخرى

العالم كله بيقول علينا انا شعب عاطفى و مشاعرنا بتحكمنا

طيب ما هو جميل ان احنا نحس ببعض و نقف جنب بعض لكن فى المواقف اللى تستاهل و غير كدة نبدا نحقق طموحتنا و اهدافنا بقى بلاش نحققها كلها ربعها حتى

اسفة على التطويل

NOHA said...

مرسى يا ياسمين

لكن انا عاوزاك تخدى بنصحتى و تقفى على رجلك شوية

حاولى تخدى اجازة من التفكير فى المشاكل و الأحزان و اقفى اتفرجى على حياتك من بعيد و احكمى عليها حكم موضعى و بعد كدة قررى انتى عايزة تعملى ايه

NOHA said...

ابن ناصر

اعتقد ان حد قالى ان مستشفى المجانين اتقفلت و عملوا مكانها مستشفى لعلاج الادمان

ارجوك تتاكد من الموضوع دة و ترد عليا علشان نطمأن على مستقبلنا يا ترى هانروح فين فى الآخر

NOHA said...

هلوسة

على فكرة انا كمان بقيت باكبر دماغى على الاخر لحد ما هتنفجر قريب حتى انا نفسى مش مصدقة انى بقيت بالبرود دة
بس على رأيك انا لقيت ان هو دة اللى ماشى اليومين دول

اما انى اجرب اهتم بشئ فانا باعمل كدة فعلا و اخرج من حالة الملل و الاحباط و اللا مبالاة دى لمدة يومين بالكتير و ارجع ازهق و ادور على حاجة تانية

تقولى ايه بقى جوزائية متقلبة و انا و لله الحمد احمل صفات برج الجوزاء المتقلب بكل ما فيه

ibn nasser- ابن ناصر said...

...>دعوه الي كل مصري حقيقي<
سيكون الاستفتاء علي التعديلات الدستوري يوم الاثنين الموافق 26-3-2007 والباب مفتوح من الساعه الساعه السابعه صباحا الي السابعه او السادسه مساء وسيكون الاستفتاء بالبطاقه الشخصيه اذا كان في الشخص سيذهب لدائرته اما اذا كان المواطن يريد ان يذهب للاستفتاء في مكان أخر فهذا يتطلب البطاقه الانتخابيه ..يا جماعه يالا نروح يالا خليهم يسمعوا صوتنا ..المقاطعه معني السلبيه هنروح ونقول لأ كلنا ..هتروح؟

شاب نفسه يحقق حلمه said...

طبعا الكلام ده صح
وفعلا الكوسه ماشيه عندنا اوي
يعني مثلا
في امريكا تم حبس اشهر ممثله امريكيه لانهم معندهمش كوسه زينا
بقولك هو كيلو الكوسه بكام دلوقتي
تحياتي وانتظر زيارتك

safa7_karmooz said...

نفسى مرة ادخل الاقى بوست جديد

Selfmeaning said...

اسمحى ليا ابقى متطفلة عندك شوية

خصوصا ان البوست بتاعك عجبنى اوى

لان كلنا بنهرب من المسؤليتنا اللى

احنا بنقول عليها صعبة

و بنبدا ندور على حاجات تتقدر تشغلنا

و لكن بنرجع فى النهاية مكان ما هربنا

يبدا الاحسن منهربش و نصبر شوية

و اكيد هنتغير