Saturday, February 10, 2007

التاج علينا حق

بجد يا محمد انا مش عارفة اقولك ايه على دعوتك ليا فى التاج دة
عموما مرسى كتير كتير :

ايه اللى هيحصل لايميلك لما تموتى
طبعا الايميل بتاعى هيتكتب بالذهب الخالص على ورق بردى و يتحفظ فى قاعة المخطوطات النادرة فى قسم المصريات فى متحف اللوفر
اديت الباسورد لحد قبل كدة
مرة واحدة فى حياتى كنت مرتبطة بانسان معين طلب منى الباسوورد بتاعى و لما انفصلنا غيرتة طبعا
اسمك ايه
نهى هانم
اسم الدلع المشهورة به وسط اصحابى
نانوووه
عمرك
27 سنة
برجك
الجوزاء و احمل كل صفات الربج و اهم ما فيها تقلب المزاج
مجال دراستك
ادب انجليزى
شخصيتك نوعها ايه
انا هاجاوب على السؤال دة من خلال اراء الناس عنى انا بحب الناس و بتعامل معاهم بصفاء نية و طيبة زيادة عن اللزوم و يمكن دة شيئ سبب لى مشاكل كتير و كمان اجتماعية و بحب يكون لى اصحاب كتير بفكر فى الناس اللى حواليا اكتر من نفسى لدرجة انى ممكن انشغل بمشكلة حد من اصحابى او زملائى فى الشغل و احاول احلها باى طريقة اما بالنسبة لعيوبى فاكتر واحد فيها هو انى مودية بدرجة كبيرة و دايما بحب التغيير يعنى لازم اغير كل شيئ املكة باستمرار حتى لو غيرت كرسى من مكانة فى البيت بدون ما اشترى كرسى جديد مكانة دة شيئ بيسعدنى جدا
السفر بالنسبة لى
شيئ ممتع لانه تغيير لكن اكتر حاجة بكرها فى السفر هو الساعات اللى باستغرقها فى السفر يعنى باكره مووت قاعدة الأتوبيس او العربية او اى شئ بكون عاوزة اغمض عينى و افتحها الاقى نفسى وصلت نفسى كمان نفسى اعمل عمرة لكن لما اتجوز علشان انا دلوقت ما عنديش محرم
المود بتاعك
ذى ما قلت انا مودية جدا بحب التغيير بدرجة مجنونة تقدر تقول بعشق التغيير اقل حاجة تفرحنى و اقل حاجة تزعلنى و افضل متعكننة طول اليوم
وقت فراغك بتعملى فيه ايه
تقريبا ما عنديش وقت فراغ على طول بلاقى حاجة اعملها و احيانا بحس اليوم ما بيكفيش انا يا اما باشتغل يا خارجة يا باشتغل فى البيت يا بتفرج على التليفزيون يا قدام الكمبيوتر دايما عندى الف حاجة اعملها .
الأكلة المفضلة
مش اكلة معينة لكن عموما انا بحب الأكل الايطالى قوى ( بيتزا - مكرونة - لازانيا - كانولونى ) و بحب كمان المشويات تقدر تقول ان لو كانت البيتزا رجلا لتزوجتة

الصفات الى اخدتها من بابا
الطيبة - خدمة الناس بلا مقابل - الحرص على الكسب الحلال
الصفات التى اخذتها من ماما
هو انا فى الحقيقة اخذت الصفات دى لكن احيانا بتظهر و احيانا لا يعنى مثلا طولة البال و التعامل مع الناس بلباقة الاحترام الشديد لمشاعر الغير طبعا ماما و بابا فيهم صفات حلوة كتير قوى لكن انا باتكلم عن اللى اختة بس ( نوعا ما يعنى )
اكتر ستة حاجات بحبها
- صلاة الفجر و قرءاة سورة الواقعة و ما حدش يسالنى ليه انا جربت الموضوع دة و لقيت ان اليوم دايما بيعدى جميل بدون مشاكل و من يومها قررت انى مش هاكسل ابدا عن الصلاة و القراءة
SHOPPING - بحبة موووووت
- سماع الأغانى عربية و اجنبية
- البيتزا (my beloved)
- التجارة بحب مووت اشغل دماغى و ما اعرفش ليه دماغى بتشتغل فى الشر اكتر من الخير حتى لو المكسب مش كتير بس باستمتع جدا لما امسك التراب و يتحول فى ايدى لفضة مش هاقول دهب علشن ما تبقاش وسعة شوية
- هيه حاجة غريبة شوية لكن بحبها و بعد قدمها بالساعات عارفين القنوات الى باتشغل قرءان على طول اليوم بحب اقرا الترجمة الى مكتوبة بالانجليزى يمكن عايزة اعرف الناس دى بتفهم القران الزاى
- بحب قوى المكياج بانواعه و الابتكار فيه كمان
شخصية متناقضة مش كدة مش بقولك جوزائية
اكتر سته حاجات بكرههها
- الصحيان بدرى للشغل
-اثق فى شخص قوى و احبة قوى و يخوننى انا باكره الخيانة بجميع انواعها
- اكون مفلسة
- الفشل بجميع انواعه بصراحة ما بتحملش الهزيمة
- ان ادى لشخص ما اهتمام معين و اعملة حساب و هو يتجاهلنى
- زيارة شخص غير مرغوب فيه و من غير موعد سابق
-اكتر حاجة تضايقنى جدا و بسرعة لما انزل الاقى العربية بتعتى مخبوطة و هى واقفة مكانها
الشغل بالنسبة ليا
تقريبا كل حياتى يعنى اغلب اصحابى من الشغل و وقتى اغلبة فى الشغل خصوصا انى باشتغل فترتين بصراحة ما اقردش اتخيل حياتى و انا ما باشتغلش
ايه الكمبيوتر و الانترنت بالنسبة لك
بصراحة علاقتى بالكمبيوتر بعيدا عن استخام الشغل بدات من فترة قريبة لكن لقيت نفسى بادخل فى الموضوع بسرعة و اتعلمت لغات برمجة و حبيت العملية اما الانترنت فانا تقريبا مقضية حياتى قدام الكمبيوتر بس لو سمحتولى اقول انى باكرة الشات مووت و باعتبرة طريقة متخلفة للحوار كله كدب و كمان بحس بملل شديد لو سالت واحدة عن شكلها تقول انا ذى كاترين زيتا جونس و هى فى الحقيقة كاترين و عيلتها كلها بريئة منها و لو سالت واحد بتشتغل ايه يقولك فى شركة كبيرة و منصب مرموق و هو يكون شغال كهربائى مثلا او ميكانيكى فى ورشة
احب امرر التاج لمين
انا لسة ما اتعرفتش على ناس كتير لكن امررة لكل من
الحصان الأسود
هلوسة مصرية

10 comments:

مصر هى أمى said...

تيه الاجابات ديه
لازانيا وكانولونى هيا الاخت من مصر ولا ايه فين احترام الطبقات العاملة
الفول والطعمية
ل وكانت البيتزا رجلا لتزوجتيه
انا بيتزا انا بيتزا
عموما اجاباتك حلوة
ربنا يكرمك بعريس ان شاء الله ويخلى حياتك سعيدة طبعا احنا صحاب من زمان فاجابات شخصيتك انا عارفها لانى عارف انتى اد ايه انسانة كويسة
ومتنسيش انا بيتزا

NOHA said...

مصر هى امى
ما هو بس انا نسيت اقولك انا مش بحب كل انواع البيتزا انواع معينة بس
و بالمناسبة ايه الفول و الطعمية دى اكله مشهورةو لا ايه اصل ما سمعتش عنها قبل كدة

halwasa-masrya said...

نانوووه ... انا بقرا اجابات التاج وفجاة لقيتنى تحت والله فرحت .. اصلىبفرح لما اتعرف على ناس حلوة وبتحب البيتزا ... انا رديت على التاج يا قمراية وميرسى والله خالص ويا ريت نكون اصحاب
اجاباتك جامدة جدا .. ولو انتى قاهرية يبقى عليكى وعل ( بيتزا روما - سوبارو ) احلى اكل لايطالى بجد

-_- said...

اهو تاج و داير

NOHA said...

هلوسة مصرية
يا ريت نكون اصحاب بجد
و اهو اليوم اللى قررنا نكون فيه اصدقاء هو يوم عيد الحب
ان شاء الله نفضل اصحاب على طول
مرسى يا قمر

NOHA said...

SHARM
مرسى كتير انك علقت على لتاج
و لم انك اتبعت مبدأ ما قل و دل

الحصان الأسود said...

متهيالي اني بقالي فترة مادخلتش عندك يا نهى

معلش كنت فعلا مشغول شوية الفترة اللي فاتت

بس على فكرة التاج دة انا جاوبتة من شهر تقريبا واتمررلي من كذا حد بس مش فاكر اني قريت انك قلتيلي علية

عالعموم المهم يا ستي اننا جاوبنا التاج و حققنا رغبت سموك

انتي عارفة طبعا ان معاليكي تأمري واحنا ننفذ

أحلام سعادتك اومر يا فندم

:)

طبعا مش احنا بلديات كمان

ههههههه

تحياتي

الحصان الأسود said...

صحيح

براف عليكي

انتي كدة تمام

احلى اكل هوة الايطالي طبعاً

بيتزا...... هوة انا خلفت غير البيتزا .... بس بلاش بيتزا الفراخ
كلي بيتزا سوبرسوبريم او المعجزة بيتزا السي فوود او السلامي و البيبروني يا سيدي
والله جوعتيني يا بنتي

متهيالي ان مافيش في بورسعيد حد بيعمل بيتزا كويس

مافتكرش اني عمري كلت بيتزا هناك .... مانا اصلا مابروحش من سنين الا في سفريات سريعه جدا بس طبعا مافيش احلى من اكل البحر في بورسعيد من اول بكلاويز البورصة لسمك وجمبري ابو عصام
ولو ان حتى هامبورجر كينج استاذ

وكل المكرونات كمان تحفة جربي الفيتوتشيني حاتعجبك

وليكي عندي لما تنزلي مصر عزومة بيتزا

إستابينا ؟؟؟

واستابينا دي بوسعيدي ايطالي برضة

ههههههههههه

تحياتي

NOHA said...

الحصان الأسود

مرسى كتير انك رضيت و لو انا انا اتخارت شوية فى الرد عليك

الظاهر انك ما جتش بورسعيد من زمان لان هامبورجر كنج لم يعد له وجود كمان ابو عصام اصبح سيئ للغاية و فيه محلات و مطاعم كتير فتحت و البلد تقريبا اتغير كتير من ملامحها

و فى خلال 5 سنين هتكون بورسعيد مرسى يخوت عالمى و هيشيلوا فندق هلنان و الميناء القديمة من اجل المشروع دة

دى دعوة ليك و لكل اللى بيقرا البوست انه يجى بورسعيد

اما بخصوص البيتزا احب اقولك ان ناس قرايب ليا عايشين فى مصر قالوا ان البتزا اللى بيعملها بيتزا هت فى بورسعيد غير اللى فى مصر تماما و بعد ما رحت اكلتها فى مصر بالصدفة صدقنى ما لقيتش و لا اختلاف واحد بس كنت لازم اجامل علشان كنت معزومة ما خبيش عليك يعنى و لا انت عارف البورسعيدية بيحبوا يرفعوا الروح المعنوية لبعضيهم

Anonymous said...

عنوانك فيه سخرية لكن

انتى عارفة انك هتموتى بجد؟
مستوعبة المعنى دة يعنى؟
طيب مستعدة له؟
مليانة متناقضات
بتصلى وبتصاحبى
بتحبى المكياج
بتقرأى سورة الواقعة عشان بتتفألى بيها
حقيقى محتاجة تراجعى نفسك شوية
وتعرفى هل حياتك دى يرضى عنها ربنا ويسرك انك تقابليه كدة واللا محتاجة تصلحى حالك اكثر