Wednesday, February 7, 2007

كله ماشى

امبارح بالليل و انا بقلب فى قنوات التليفزيون مش لاقية حاجة اعملها كالعادة و هامووووت من الملل و خصوصا لما باتفرج على قناة ميلودى افلام " اللى هى مصدر الملل كلة " اتفرجت بالصدفة على اللقاء الذى يجرية مقدم البرامج المشهور اللى دايما يعارض الناس الى مستضيفهم بس علشان يبين انه شخص من عامة الشعب العاديين و انه بيمثل صوت المواطن المقهور .
استفزنى جدا رد مدير المرور على السؤال الى وجهه له المذيع المتأنق دائما و السؤال على فكرة هو " ليه قوانين المرور عندنا حازمة زيادة عن اللزوم و ان الشعب بيشتكى من عدم المساواة فى الظلم بمعنى ان واحد يروح المرور يلاقى عليه مخالفات بالألوفات و علشان قريبة فلان او علان ما يدفعش و يتشالوا بجرة قلم ؟"
هنا بقى مدير المرور فجر المفجأة و قال انه لما راح قلم المرور الصبح لقى ان عليه 5000 جنية مخالفات و انه لازم يدفع المبلغ دة لان القانون ما يعرفش ابن فلان و لا ابن علان و ان المرور بيسهل على المواطن كافة الاجراءات لتسديد الغرامات و انه نجح فى القضاء على الروتين .
تصوراان دة ممكن يحصل ؟ اه ممكن يحصل لكن فى عام 2060 إن شاء الله لما يكون كل شيئ بيتم حوالينا من خلال الكمبيوتر علشان الكمبيوتر ما يعرفش فلان و لا علان و لو ان انا متأكدة ان ساعتها هيلاقوا حل و يرشوا الكمبيوتر يا اما " بهارد جديد " او " بماوس واير ليس محصلتش " و كله ماشى ذى ما قالت " نادية الجندى" فى فيلم خمسة باب"
انا كنت اعرف واحد مهم جدا فى المرور و كنت لما اخد مخالفة ابلغوا و على طول تتشال او الرخصة تتسحب و بعد ساعة واحدة تكون عندى لكن بعد ما سافر و طبعا انتوا عارفين ان اللى بيبعد عن منصبة كأنه كلب و راح رخصتى اتسحبت امبارح و كان لازم اقف فى نفس طابور الناس الغلابة الى ما لهمش ضهر علشان ارجع الرخصة المسحوبة و روتين و اجراءات معقدة و روحى هنا لا روحى هنا مشاوير ملهاش اى لازمة خلونى لعنت اليوم اللى سوقت فيه و لان طبعا كل شئ ماشى عندنا بالفلوش اتبعت مبدا هين نفسك و لا تهين قرشك و دفعت فلوش للعامل الى بيصور الورق علشان يخلص الاجراءات كلها بدالى و قعدت على الكرسى بعيد اتفرج على المواطن الغلبان و ما اعرفش ليه افتكرت كلام مدير المرور و سألت نفسى يا ترى ايه هو مفهوم المساواة فى الظلم بالنسبة له و يا ترى لما مدير المرور هيدفع ال 5000 جنية غرامة هيقف بردة فى الطابور و لا هايعمل ايه ؟

8 comments:

مصر هى أمى said...

للللللووووووووووووى
مبروك يا نهى على المدونة الجديدة ايه الحلاوة ديه من اولها كده هتغلطى فى الحكومة
لا يااختى انا معلمتكيش كده
يا باشا بتاع امن الدولة انا معرفهاش ولا علمتها تعمل مدونة ازاى
ثم ايه قناة ميلودى افلام ديه ديه بعد القناة التانية على طول

وانهى ان شاء الله مدير مرور ده اللى جايلوه 5000 جم مخالفة ثم ده مفروض يتكسف على دمه يبقى مدير مرور وبيعمل مخالفات ده مفروض يكون اول واحد ملتزم

ومبروك تانى يا باشا ومتحرمناش من الزيارة

مصر هى أمى said...

نهى
انا مررت ليكى تاج ادخلى عندى
وشوفية ومستنى اجاباتك

الحصان الأسود said...

اولا مبروك المدونة

انتي برضة بتصدقي كلام الاهبل مدير البتاع دة

ههههههههههههه

يعنى يخش دماغ مين ان مدير المرور علية مخالفات اصلا وقال ايىة ب 5000 جنية

والنبي تلاقية مامعهوش رخصة من الاساس والعربية ماشية بدون نمر
ومتفيمة اسود وحاطط الكاب عالتابلوة و النسر عالقزاز

هههههههههه

ابن الكلب عاوز يقنعنا انة بلد ديمقراطي وانة مواطن زية زي عامه الشعب و بيجي علية مخالفات

فاكر ان الناس دس هبلة وحاتصدق السفه اللي بيقولة

وقوانين مرور اية اللي صارمة في البلد والناس بتشتكتي

هوة الناس فس مصر بتعرف تسوق اصلا

والله العظيم تلاتة مافية حد في مصر بيعرف يسوق ولا يعرف قواعد السواقة والمرور من الاصل

الناس بتمشي بعربياتها بالجنب اكتر مابتمشي لقدام
ولا حد بيلتزم بالحارة اللي هوة ماشي فيها
دة لو كان فية حارات في الشوارع من الاصل - حيث ان 80% من شوارع مصر مش متخططة اساسا ولا متقسمة حاات

ولا حد في مصر بيعرف اصلا ازاي يلف بالعربية ملف ولا يعرف اصول تخطي سيارة مقابلة او اصول استعمال الاشارات

بلد الناس سايقة فيها بالبيومي والهابوللي

ساقين ميكرباص علا اجرة على ملاكي ماشيين في ميغه

واللي يلبس فيكي من ورا وغلطان وماشي زي الاهطل وينزل يتخانق ويزعق و السلام بمبدأ خدوهم بالصوت ويقولك انت ماديتش اشارة او يقولك انت اللي جاي من اقصى اليمين

مع العلم انك ماشية في خط مستقيم و لا ملف ولا لفيتي وهوة اللي بهيم وة اساسة بس هوة لازم ينزل يزعق و يقول اي كلام والسلام علشان ماحدش يقولة ادفع تمن الاصلاح اللي انت السبب فية

والناس دي كل اللي يعرف فيها اي كلب امين شرطة في مرور ولا بيدفع مخالفة
وتالاقية طول السنة ماشي عكسي وراكن ممنوع او صف تاني

واللي ماشي صح يلاقي علية مخالفات بألوف في حتت عمرة ماراحها بس هيه مخالفات لازم تندفع و تتشال من ملفات الوسايط وتروح اي ملفات تانية بعد ماتتعدل النمر اللي فيها

والمبدأ في مصر ان حاميها حراميها في كل حاجة

وعربية اي ظابط شرطة بتبقى باينة من اولها

بدون نمر و فيمية اسود عالقزاز كلة و لا حد يكلمة

وانت لو حطيت 10 سم فيمية في القزاز القداماني من فوق علشان الشمس تتسحب رخصك فورا في اللجنة بينما اللي قدامك ماشي بعربيتة اوضة نوم ضلمة

ولو النمرة وسخة شوية او الدهان مقشر تتسحب رخصك برضة بينما الباشوات ماشيين بدون نمر اصلا

اللي سافر برة في اي دولة وشاف الناس بتسوق برة ازاي في اي دولة متحضرة متقدمة حايحس باللي انا باقولة و اكيد شايف المأساة اللي احنا فيها

اعذريني ان كنت طولت ... لكن الموضوع جاء عالجرح

الحصان الأسود said...

اة على فكرة كلام "مصر هيه امي" صح وفية شيء من المنطق برضة

يعني انا لو مدير مرور و مابعرفش اصول ولا قواعد السواقة لدرجة اني باعمل 5000 جنية مخالفات في السنة يبقى واجب اني اكتب استقالتي فورا واروح اشتغل سواق ميكروباص

انا لو وزير داخلية وشفت مدير مرور بيقول الكلام دة عالهواء اطلعه معاش و اسحب رخصتة كمان علشان يروح يتعلم السواقه الاول و يشوفللة شغلانة تانية

يعني لواء مرور يبقى بقالة عالاقل 35 سنة بيشتغل في المرور لو مايعرفش قواعد المرور وبييجي علية مخالفات ولو ب 500 جنية يبقى يروح يموت نفسة احسن ولا ينزل يقف في ميدان رمسيس يفتح الاشارة و يقفلها من الاول زي اي حمار عسكر مرور

halwasa-masrya said...

هههههههه مش عارفة ليه البوست ده ضحكنى .... مدير المرور عليه خمسة الاف ( دى نكته ) انه راح دفعهم باه ( دى فطستنى من الضحك ) لا حول ولا قوة الا بالله

وسعت منه اوى المرة دى ...

NOHA said...

الحصان الأسود
عجبنى اوى الرد بتاعك
شكلك كدة مضايق اوى من حكاية المخالفات دى بس تفتكر كلامك و كلامى دة هيجيب نتيجة فى يوم من الأيام و لا احنا ما نبدأش نتحرك الا لما يحصل مصيبة كبيرة
غير كدة الناس بتسمع الكلام و تغير المحطة و خلاص و تحاول تتفرج على اى فيلم كومدى غير الفيلم الكومدى اللى سمعوة عن حقوق المواطن فى مصر

NOHA said...

هلوسة مصرية
شكرا على ردك
عموما كل حاجة اليومين دول بقت واسعة لدرجة ان البلد ما عدتش على مقاسنا .

NOHA said...

مصر هى امى
شكرا يا ردك
و ما تخفش يوم ما هقف ادام البيه الظابط هقول انك اللى عرفتنى طريق المدونة و انت اللى بتقترح عليا كل اللى اكتبة
ما تخفش يا سيدى وراك رجالة